Nagbalik si US Secretary of State Antony Blinken sa Israel agud nga maplastar pa gid ang ginaduso nga ceasefire kag hostage-release deal sa Gaza.
Ini na ang iya ika-siyam nga byahe sa Middle East halin sang nagsugod ang giyera sa Gaza sang Oktubre 2023 kun sa diin lapaw na sa 40,000 ka Palestinians ang nagkalamatay.
Ini nga pagbisita ang kasunod man sa ginpresentar sang Estados Unidos nga modified proposal para nga mataytayan na ang indi paghangpanay sang militar sang Israel kag militante nga grupo nga Hamas.
Natabo ini sa Qatar kun sa diin yara man ang Egyptian, US, kag Qatari mediators.
Kun sila ang pahambalon, may improvement na sa ginaduso nga ceasefire, apang suno kay Hamas political bureau member Sami Abu Zuhri, ilusyon lamang ang pahayag nga may progress na sa negosasyon.
Ginpahayag sini nga indi deal ukon matuod nga negosasyon ang ginaplastar kundi mga pagpangdikta sang Estados Unidos sang Amerika.
May statement man ang Hamas nga naga-akusar kay Israeli Prime Minister Benjamin Netanyahu nga naga-set ini sang bag-o nga mga kondisyon kag nagapamalibad sa pag-withdraw sang pwersa-militar sa Gaza.
Nahibaluan nga sa amo nga proposal, may panawagan sa Hamas nga buy-an na ang ila mga ginbihag sang nag-atake sila sang Oktubre 7, 2023 sa southern Israel; samtang kabaylo sina, ang Israel ang maga-isol naman sang ila pwersa sa Gaza kag ila man hilwayon ang Palestinian prisoners.
