Nangin emosyonal ang national convention sang Democrats nga nagsentro sa pagpamilin-bilin ni United States President Joe Biden nga una na nag-atras sa pagpadalagan kag gin-endorso si Vice President Kamala Harris para sa pagka-presidente.
Sa speech ni Biden, ginsiling niya nga ang pagpili niya kay Harris sang 2020 bilang runningmate ang ginakabig niya nga best decision sa iya bilog nga career.
Dugang pa sini nga si Harris ang mangin pangulo nga tanglaon sang mga kabataan kag irespeto sang mga lider sa bilog nga kalibutan.
Ginakabig naman niya nga dako nga kadungganan nga makapangalagad siya sa America kag apisar palangga niya ang iya trabaho, mas palangga niya ang iya pungsod gani ginatugyan na niya ang responsibilidad kay Harris.
Kalakip man sa naghatag sang speech si anay First Lady Hllary Clinton kun sa diin ginsiling sini nga nagapati siya nga mangin pinakauna nga babaye nga pangulo sa US si Harris.
Matandaan nga gin-endorso ni Biden si Harris para magbulos sa iya batok kay anay US President Donald Trump matapos ang panawagan sang kapartido bangud sa kabalaka nga indi na masarangan sang iya lawas ang panibag-o nga apat ka tuig sang pagpamuno sa USA.
Ginpili naman ni Harris si Minnesota Governor Tim Walz bilang iya nga runningmate.
