ILOILO CITY- Nagresulta sa pagpugok sang trapiko ang ginpatigayon nga tagtaganay sang ayuda sang Department of Social Welfare and Development sa Iloilo Sports Complex sa Magsaysay Village, La Paz, Iloilo City.
Ini matapos nga wala gintugotan nga makagwa pa sa Luna Street Lapaz ang mga salakyan kag nangin one- way nalang pasulod sa Iloilo Sports Complex.
Sa interview sang Bombo Radyo kay Punong Barangay Gina Barrientos, iya ginpahayag nga ginkadismaya sini ang natuga nga huol sang aktibidad bangud madamo nga mga estudyante kag pumuluyo ang naperwisyo.
Suno kay Barrientos, naapektuhan man ang byahe sang mga trisikad sa iya barangay.
Nahibaluan nga ginpasirado ang dalan humalin las-otso sa aga tubtob las-onse sang aga base man sa advisory sang Iloilo City Traffic Management Unit.
Magalawig tubtob buas,Agusto 22, ang tagtaganay sang ayuda nga nagalakip sang ₱2,000 halin sa Assistance to Individuals in Crisis Situation sang Department of Social Welfare and Development kag ₱3,000 sa iya sang Ayuda para sa Kapos ang Kita Program.
Naglab-ot naman sa 7,500 ka mga indibidwal halin sa probinsya kag siyudad sang Iloilo ang benepisyaryo.
Sa interview naman sang Bombo Radyo kay USWAG ILONGGO Partylist Representative Jojo Ang nga nagbulig agud mapatigayon ang tagtaganay, iya ginpahayag nga siya ang nangita sang venue nga makaigo ang tubtob 10,000 ka tawo rason nga ginpili sini ang Iloilo Sports Complex.
Suno kay Ang, bangud nga kapin sa 13,500 ang benepisyaryo, ginpakamaayo nila nga himuon ini nga duha ka adlaw.
