ILOILO CITY- Yara na sa kustodiya sang otoridad sa Indonesia si Katherine Cassandra Ong, nga naangot sa POGO sa Porac,Pampanga.
Gintuad ini ni Santa Rosa, Laguna Representative Dan Fernandez sa House mega-panel hearing subong nga adlaw.
Gindugang ni Fernandez, co-chairperson sang House “quad committee” nga nagausisa sa illegal POGOs, extrajudicial killings, kag Chinese syndicates, nga nagapakig-angot na ang Philippine National Police sa Indonesian authorities agud dal-on ini pabalik sa Pilipinas.
Si Ong nga kilala nga si Cassy Ong ukon Cassy Li ang ginatudlo nga naangot sa Lucky South 99 POGO sa Porac, Pampanga.
Siya man ang nag-recruit kay former presidential spokesperson Harry Roque agud mangin abogado sang Whirlwind Corporation, ang real estate firm nga nagpaarkila sang duta sa Lucky South.
Sang Hunyo, ginsiling sang otoridad nga ang Lucky South 99 POGO hubs ang pugad sang human trafficking, forced labor, kag mga scam activities.
