DUMANGAS, ILOILO – Dakop sa ginpatigayon nga drug buy bust operation ang isa ka anay Barangay Tanod sa Pulao, Dumangas, Iloilo.
Ang arestado amo si Judemar Antonio Guelos, 47, residente sang nasambit nga lugar.
Sa interview sang Bombo Radyo kay Police Major Samuel Vipinosa, hepe sang Dumangas Municipal Police Station, iya ginpahayag nga nabaklan si Guelos sang iligal nga droga balor P13,700.
Sang ginrikisa sang mga otoridad, nakuhaan pa gid ini sang dugang nga 50 grams sang suspected shabu balor P340,000.
Magluwas diri, nakuhaan pa gid ini sang armas nga .38 revolver kag 13 ka mga bala.
Sa subong, preso na ini sa Dumangas Municipal Police Station kag nagapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
