Ginkumpirma sang Bureau of Immigration (BI) nga yara sa gihapon sa Indonesia si dismissed Bamban, Tarlac Mayor Alice Guo kag wala pa nagtuyo nga maghalin sa amo nga pungsod.
Suno kay Immigration spokesperson Dana Sandoval, magluwas sa ginpahalin nga alkalde, yara man sa Indonesia ang utod ni Guo nga si Wesley sa pihak sang impormasyon halin sa Presidential Anti-Organized Crime Commission (PAOCC) nga nakahalin na ini sa nasambit nga pungsod.
“We are waiting sa confirmation ng Indonesia counterparts natin kung may mga updates po sa biyahe niya.”
Ang pangalan ni Guo ang nakalista sa immigration lookout bulletin kasunod sang imbestigasyon sa iya matuod nga identity kag ang iya kaangtanan sa mga ilegal nga aktibidad sang isa ka Philippine Offshore Gaming Operators (POGO) sa Bamban.
Nauna na nga ginpahayag sang mga otoridad nga naghalin si Guo sa Pilipinas sang Hulyo 18.
Kahapon, ginpakita sang PAOCC ang picture ni Guo sa Kuala Lumpur International Airport sang Hulyo 21.
Samtang, ang mga upod ni Guo nga sanday Shiela, utod sini, kag ang isa ka tiglawas sang isa pa ka POGO firm sa Porac nga si Cassandra Li Ong, ang nadakpan sa Indonesia kag ginpreso na sa Pilipinas.
Nahibaluan nga ginabantayan na sang mga otoridad sang Pilipinas kag Indonesia ang pagsulod ni Guo sa Indonesia humalin sang nagligad nga semana.
Kaangot sini, ginpahayag ni Interior Secretary Benhur Abalos nga ang pagkadakop sa mga kaupod ni Guo, ang mangin dako nga bulig agud maaresto ang ginpahalin nga alkalde.
