ILOILO CITY- Ginsulod sang ginabanta 2,000 ka mga pulis ang Kingdom of Jesus Christ compound sa Buhangin, Davao City para pangitaon si Pastor Apollo Quiboloy kag kasubong sini nga mga akusado agud nga maserbehan sang warrant of arrest.
Halin ang mga pulis sa Regional Office XI kag ini nga compound ni Quiboloy ang nahamtang naman sa Buhangin District, Davao City.
Suno kay Brigadier General Nicolas Torre III, PNP Region XI director, 5:27 sa kaagahon nagsugod ang ila pagsulod sa compound
Matandaan nga nagtuyo man ang kapulisan nga magserbe sang arrest warrant kay Quiboloy sang nagligad nga June 10 sa Davao City kag sang amo nga tion, may ginpangggamit pa nga mga hagdananan para magtaklas nga ginkaakig naman sang mga taga-suporta ni Quiboloy nga nagahulat sa guwa.
Ang amo nga self-proclaimed appointed son of god ang gapangatubang sang kaso nga paglapas sa Section 5(b) sang Republic Act 7610 ukon Special Protection of Children Against Abuse, Exploitation, and Discrimination Act kag Section 10(a) sang amo man nga layi.
Nagapangatubang man si Quiboloy sang non-bailable Qualified Human Trafficking charge sa idalom sang Republic Act No. 9208 sa Pasig court apang nagpanginwala ini sa tanan nga mga akusasyon sa iya.
