Indi magbiya ang 2,000 ka mga pulis sa compound sang Kingdom of Jesus Christ (KOJC) sa Davao City tubtub nga indi sini maaresto ang self-proclaimed Appointed Son of God nga si Pastor Apollo Quiboloy.
Suno kay Police Regional Office (PRO) XI director Brigadier General Nicolas Torre III, kumpyansa sila sa impormasyon nga napalab-ot sa ila nga yara lang sa sulod sang compound si Quiboloy apang nagahampang ini sang “panaguay” kadungan sang pag-raid sang mga pulis.
Gin-ako ni Torre nga nagapanguna nga pagpanghangkat sa pwersa sang kapulisan amo ang kadakuon sang kingdom bangud 30 ka ektarya ini kag 1/4 pa gid lamang sa compound ang ila nga na-search sa una nga 16 ka oras halin sang ginsuguran ang operasyon pasado 5:00 kahapon sang kaagahon.
Suno sa general, ginpapahuway lang anay ang mga pulis kagab-i apang nag-resume man gilayon ang operasyon para madakpan si Quiboloy kag lima sa iya kaupdanan.
Gin-alerto man ni Torre ang tropa sang kapulisan bangud nakabaton sila sang impormasyon halin sa informants nga buligan sang mga miyembro sang Kingdom si Quiboloy agud nga makaguwa ini sa compound.
Sa pagkamatuod suno sa iya, may ginaalegar na nga attempt nga sugaton ang pastor bangud may pula nga pickup truck nga naglampas sa police checkpoint, nag-diretso sa compound, kag sang ulihi natukiban nga ginamaneno sang driver ni Quiboloy.
Makaduluda man suno sa iya ang mga aktwasyon sang mga sumulunod ni Quiboloy bangud gina-distract nila ang ma pulis paagi sa matunog nga sound systems kag nagabais man ang mga ini sa otoridad.
Duha na ang ginaalegar nga napatay sa amo nga operasyon sang compound matapos lunsay gin-atake sa korason bangud sa raid, samtang walo naman ang gindala sa ospital matapos nga nag-collapse.
Ang mga nasamaran ang lunsay na nag-file sang police blotter report batok kay General Torre.
