Nagapati ang Presidential Anti-Organized Crime Commission (PAOCC) nga ginatinguhaan ni anay Bamban, Tarlac Mayor Alice Guo nga makalusot kag makasulod sa “Golden Triangle” agud mapalagyuhan ang otoridad nga nagalagas sa iya halin sang nagpalagyo ini sa Pilipinas.
Ang Golden Triangle isa ka rehiyon sa Southeast Asia nga nahamtang malapit sa Mekong River kag may border sa Myanmar, Laos, Cambodia kag Thailand.
Matawag nga crime-infested ini nga lugar ukon napun-an sang transnational organized crimes kag ginapahayag pa nga kontrolado sang mga sindikato kag triads.
Suno kay PAOCC spokesman Winston John Casio, amo man ini ang pinakamahapos nga destinasyon ni Guo bangud may business interests ang iya pamilya sa Golden Triangle particular ang gambling interests sa Cambodia.
Ginadula man sini ang posibilidad nga magkadto si Guo sa China bangud istrikto ang amo nga pungsod sa ila nga pagsulundan batok sa illegal nga mga pasugal.
Sandig sa latest nga mga impormasyon halin sa ila foreign counterparts, ginapatihan nga yara pa si Guo sa Batam, Indonesia, isa ka isla kun sa diin nadakpan man ang utod sini nga si Sheila kag ang isa ka POGO representative nga si Cassandra Li Ong sang nagligad nga Martes, Agusto 20.
