Ano ang imo ma-bida-bida nga adventure sa imo edad subong?
Basi pirdehon kag sang isa ka 102-anyos nga Lola nga “extra na extra” gid ang ginhimo kadungan sang iya kaadlawan sang nagligad gid lamang nga Agusto 25!
Ini nga centenarian amo si Manette Baillie, kasado sa isa ka paratrooper, kag naka-serbe anay sa Women’s Royal Navy Service sang World War II.
Wala sang kahadlok si Lola nga nag-skydive sa Suffolk, England kag matapos nakumpleto ang 7,000 ka tapak ukon 2133-meter jump, siya na ang ginakilala nga oldest skydiver sang Britanya!
Apang wala niya ini ginhimo para lamang sa titulo.
Kadungan sang amo nga challenge, ang iya natipon nga pondo nga $13,000 ang magakadto sa iya paborito nga mga charity sa nagkalain-lain nga United Kingdom.
Lakip sa iya ginpili nga charities amo ang East Anglian Air Ambulance nga amo anay ang nagluwas sa kabuhi sang iya anak nga lalaki sang naaksidente ini sa salakyan sang 1969.
Indi lamang pamilya kag mga abyan ang nagbantay kag nagpalakpak sa nahimo sang Lola bangud mangin ang mga miyembro sang Royal Family ang nakakilala sa iya kag bilib gid sa iya abilidad.
Lakip sa nagtamyaw sa iya amo si Prince William (nga amo ang masunod nga hari sang Britanya) nga nagpadala sang iya mensahe kaupod sa iya asawa nga si Princess Catherine ukon si Kate Middleton.
Indi man ini ang una nga tion nga may thrill kag challenge nga ginsudlan ang Lola sa iya kaadlawan bangud sang nagselebrar siya sang iya 100th birthday, nagmaneno ini sang race car sa official track sang British Grand Prix kun sa diin nakalab-ot ini sa 130 miles per hour.
Sang ginpamangkot sa iya panugyan sa mga bataon pa, ginsiling sang Lola nga dapat mangin busy gid pirme, mangin interesado sa madamo nga bagay, magpabilin nga mabuot sa mga tawo sa palibot, kag labaw sa tanan, indi gid magkalipat nga mag-“party” para maglawig ang kabuhi.#
