Balantayan umpisa 10:00 subong nga aga ang pagtingob-pwersa sang tatlo ka mga committee sa Senado sa atubang sang 26 ka resource persons nga may inughambal gid kaangot sa makahuluya nga pagpalagyo ni dismissed Bamban, Tarlac Mayor Alice Guo kag iya mga kaupdanan pakadto sa luwas sang pungsod.
Magapanguna sa hearing ang Senate committee on justice and human rights nga ang chairperson amo si Minority Leader Aquilino Pimentel Ill, samtang secondary kag tertiary committees naman ang Senate committee on women, children, family relations, and gender equality ni Deputy Minority Leader Risa Hontiveros kag Senate committee on public services ni Senator Raffy Tulfo.
Isa sa resource persons amo ang utod ni Guo nga si Sheila Leal Guo nga gin-turnover na sa Senado kahapon sang National Bureau of Investigation (NBI) matapos ginpasakaan sang kaso bangud sa obstruction of justice kag illegal use of passport kag iban pa gid nga criminal charges.
Ang business partner naman ni Guo nga si Cassandra Li Ong ang gindala naman sang NBI sa House of Representatives. Si Sheila kag si Ong ang pareho nga nadakpan sa Batam Island sa Indonesia sang Agusto 20.
Lakip sa ginalauman nga istoryahan amo ang proposal sang Department of Foreign Affairs nga kanselahon ang Philippine passport ni Alice Guo ukon ang Chinese national nga si Guo Hua Ping.
Lakip man sa imbitado amo sanday Justice Secretary Jesus Crispin Remulla, Foreign Secretary Enrique Manalo, Interior Secretary Benhur Abalos, Information and Communications Technology Secretary Ivan John Uy kag Transportation Secretary Jaime Bautista.
Yara man ang mga tiglawas sang NBI, Philippine Amusement and Gaming Corp. (PAGCOR), Securities and Exchange Commission, Civil Aviation Authority of the Philippines, Philippine Statistics Authority, kag Presidential Anti-Organized Crime Commission.
Balantayan man kun magatambong ang abogado nga si Elmer Galicia nga amo ang nag-notaryo sa counter-affidavit ni Guo subong nga bulan apisar nakumpirma sang otoridad nga nakalayas na ini sa Pilipinas sang bulan pa lamang sang Hulyo.
