ILOILO CITY- Ginalantaw sang otoridad nga nakapatigayon na sang surveillance ang mga kawatan nga nagransak sa Iloilo Supermart sa Barangay Tabuc Suba, Jaro, Iloilo City kun sa diin nataban sang mga ini ang P1.3 million nga kwarta.
Sa interview sang Bombo Radyo kay Police Major Eduardo Siacon Jr., hepe sang Jaro Police Station, iya ginpahayag nga isa sa ila ginalantaw nga anggulo amo nga gwa-sulod na sa establishment ang mga kawatan agud manila kun sa diin nahamtang ang vault rason nga nangin mahapos sa ila nga sudlon ini.
Suno kay Siacon, posible nga madugay na man nga naplanuhan ang pagransak.
Una na nadiskubrihan sang empleyado sang mall nga may kinutkutan nga buho nga nahamtang sa daan nga entrance, kon sa diin, may kalabaon ang tunnel nga walo tubtob pulo ka metros.
Ginalantaw man nga ang buho ang posible nga gin-gamit man sang mga kawatan agud nga makasulod.
Sa subong, nagapatigayon sang back tracking sa mga closed-circuit television sa lugar nga posible na-capture ang paglabay sang mga kawatan.
