Ginpamatud-an sang isa ka personnel sang Bureau of Fire Protection nga indi lang ang safety sang publiko ang ila ginapakibato ilabi na sa tion sang sunog.
Iya man ginapakigbato ang masanag nga palaabuton sang mga kabataan sa iya komunidad.
Suno kay Senior Fire Officer 1 Sussie May L. Magan, assigned sa Roxas City Fire Station kag residente sang San Miguel, Jordan, Guimaras, ginahatagan gid niya sang importansya ang kaayuhan sang kabataan ilabi na kun ang ila edukasyon ang istoryahan.
Ini ang rason kun nga naghimo sang iya inisyatibo si Magan agud buligan ang mga nagaeskwela nga kabataan.
Isa sa iya ginpatigayon nga aktibidad amo ang pagpanagtag sang school supplies sa iya 15 ka adopted nga mga estudyante sa Brgy. San Fernando, Buenavista, Guimaras sang nagligad nga Hulyo 7,2024.
Kalakip sa iya ginpanghatag amo ang mga papel, notebooks, ballpens, lapis, crayons, payong kag iban pa kag ini tanan halin mismo sa iya bulsa.
Magluwas diri,nagapatigayon man si Magan sang fire safety awareness lecture sa kada duha ka Domingo sang kada bulan agud itudlo sa mga bata ang ila dapat himuon sa tion nga may magluntad nga sunog,apang ang pinakaimportante nga ginatudlo niya amo ang pamaagi agud makalikaw sa sunog.
Agud mas makuha pa gid ang interes sang mga bata, nagahatag man siya sang eksaminasyon sa mga bata nga ila gid ginakalipay.
Nagatam-is pa gid ang yuhom sang mga bata bangud may yara man sila sang pamahaw bilang reward.
