ILOILO CITY– Gin-ako ni Iloilo City Mayor Jerry Treñas nga nakabatyag ini nga wala siya sang gahum nga tinluan ang pangalan ni anay Iloilo City Mayor Jed Patrick Mabilog sang tion sang administrasyon ni President Rodrigo Duterte.
Ini may kaangtanan sa gin-alegar kahilabtanan ni Mabilog sa illegal nga drugs.
Sa interview sang Bombo Radyo kay Treñas, iya ginpahayag nga wala siya sang sarang maubra bangud nga malayo ang iya relasyon sa mga Duterte.
Gintudlo naman sini si Iloilo City Lone District Representative Jamjam Baronda nga suno sa iya amo ang malapit sadto sa mga Duterte kag mas nakabulig kuntani ang kongresista kay Mabilog.
Suno kay Treñas, ang pagpahimunong niya sa kaso ni Mabilog ang indi bangud sa kahadlok, sa baylo, ini bangud sa inaccessibility sa top officials kag mga kaalyado ni Duterte.
Sa pagkamatuod suno sa alkalde, kontra siya sang mga Duterte sang amo nga panahon nga naulamid ang pangalan ni Mabilog sa drug trade sa Iloilo City.
Nagsabat naman si Baronda sa ginbuy-an nga pahayag sang alkalde.
Suno kay Baronda, ang tuyo nga pagpasa ni Treñas sang responsibilidad sa iya nga magtindog para sa syudad sang 2017 ang isa ka kaladlawan nga tikang para ipasa ang pagbasol sa inosente nga tawo.
Pahayag sang kongresista nga si Treñas sadto amo ang nagapungko nga Congressman sang 2017 kag siya ang may ginsumpaan nga katungdanan kag moral nga responsibilidad nga pangapinan ang dakbanwa kag pumuluyo.
Dugang ni Baronda, bilang abyan kag anay kaupod sa Sangguniang Panlungsod, ginbuligan gid niya si Mabilog sadto kutob sa iya masarangan kag ini ang ginapasalamatan gid ni Mayor Mabilog kay Baronda.
