ILOILO CITY – Nakahanda si former Senator Atty. Leila de Lima nga magbulig kay former Iloilo City Mayor Jed Patrick Mabilog nga kaangay niya nangin biktima man sang inhustisya sa idalom sang administrasyon ni anay Presidente Rodrigo Duterte.
Ini ang ginpahayag ni de Lima kadungan sang pagpadulong sini sa syudad sa diin nag-deliver ini sang mensahe sa symposium nga may tig-ulo nga “Weaponization of Justice: Skirting the Line Between Human Rights and Compelling State Interest” nga gin-organisa sang University of the Philippines Visayas Scintilla Jvris Fraternity kag University of the Philippines Stella Juris Sorority nga ginhiwat sa UPV Auditorium, Iloilo City campus.
Suno kay de Lima, kaangay niya nangin target man ni Duterte si Mabilog sa diin ginpasibangdan ini nga protektor sang iligal nga droga sang nagapungko pa ini bilang alkalde sang syudad.
Magluwas diri, sang Agosto 2016, ginbansagan man ni Duterte ang Iloilo City bilang ‘most shabulized city’ nga nagakahulugan nga nagaduging ang iligal nga droga sa syudad apisar wala sang mabakod nga ebidensya.
Agosto 2017, matapos nakabaton sang impormasyon sa ginaalegar assassination plot, ginpakamaayo sang pamilya ni Mabilog nga magpadulong sa Canada.
Sang 2018, ginpahog naman ni Duterte si Mabilog nga patyon niya ini sa tion nga magbalik ini sa Iloilo City.
Bangud sa pagbakante sang posisyon bilang alkalde sa Iloilo City sang amo nga tion, nagpungko si Vice Mayor Jose Espinosa III sa pwesto bilang alkalde.
