Temprano nga nagpaalam ang Filipino pole vault star nga si EJ Obiena sa iya 2024 season agud nga malikawan nga maglala ang iya gina-suprer nga spine injury nga naangkon sini antes pa man ang pagpasakop sa Paris Olympics.
Suno sa 28-anyos nga Pinoy pride, indi na siya magdayon sa pagpartisipar sa ISTAF Berlin sa Germany, Weltklasse Zurich sa Switzerland, kag Diamond League Final sa Belgium sa Septyembre matapos na-diagnose nga may fractured L5 vertebra.
Kun matandaan, nadetalye na sini nga antes ang Olympiada, may problema na ang iya likod apang nakapang-apat pa ini sa finals kag isa ka semana matapos ang Summer Games, nabulsa sini ang bronze medal sa Lausanne Diamond League sa Switzerland.
Sa iya social media posts, ginsaysay sini nga naglala ang iya back pain kadungan sang Silesia Diamond League sa Poland sini gid lamang nga semana kun sa diin nagpang-lima siya sa mga nag-compete.
Kasunod sang MRI kag CT scans, nakumpirma nga nag-suprer si Obiena sang fractured spine.
Bangud sini, indi naman madayon si Obiena sa Philippine International Pole Vault Challenge nga ginplano kuntani nga ipatigayon sa Ayala Triangle Garden sa Septyembre 20. Wala mapatpat kun patigayunon gihapon ang event, apang nagpasalig ang two-time Olympian nga may ipaguwa pa nga dugang nga mga detalye.
Apang kaangay sa iya nauna nga statements, positibo ang panan-awan ni Obiena kag nagalaum nga pagkatapos sang iya pagpahuway subong nga tuig, maka-recover siya kag makabalik sa kumpetisyon sa 2025.
“Hopefully, now that I’ve identified the source of my back problems this year, with the required four weeks off to heal, I’m hoping to return pain-free and ready for the 2025 indoor season!” dugang sini.
Pahayag pa sang world number 3: “[N]ow I need to make decisions with my head, not my emotions. The best thing to do right now, with ensuring my best future, is to rest and recuperate and come back even stronger. I am going to honor my promise: ‘You’ll see more of me and the Philippine flag will be raised on a global scale.’ It will simply have to wait a bit longer!”
Ginhimo sini ang amo nga promisa sang napaslawan siya nga makabulsa sang medalya sa Paris.
“Thank you for your support. I love you all and promise, I’ll be back!,” pagtapos sini sa iya social media post.
