Nanindugan si Justice Secretary Jesus Crispin Remulla nga wala ini nagapati kay Shiela Guo nga amo ang ginaalegar nga utod ni dismissed Bamban, Tarlac mayor Alice Guo kag indi man ini nagakabagay nga mangin state witness.
Suno sa tiglikom, nagapati siya nga ginapatalang ni Sheila ang otoridad.
“‘Yung reliability nung kanyang mga sinasabi ang problema natin eh. Hindi siya reliable witness so far. Kailangan talaga patunayan na kailangang-kailangan ‘yung kanyang testimonya upang mangyari ang lahat,” pahayag ni Remulla.
Sang nagligad nga semana,matandaan nga ginsiling sang National Bureau of Investigation (NBI) nga isa ka Chinese citizen si Sheila nga nagahingalan kay Zhang Mier nga nagpanunto agud makaangkon sang Philippine passport.
Sa hearing sa Senado sang Martes, gin-ako sini nga wala siya natawo sa Pilipinas kundi sa China kag nag-abot lamang siya sa Pilipinas sang 2001 kun sa diin gindala siya sang iya amay para magbulig sa negosyo.
Sulit-sulit sini nga ginsiling nga wala siya sang ihibalo sa operasyon sang gin-raid nga POGO hub sa Bamban kag ginpanginwala man sini nga nakahibalo siya sa lokasyon ni Alice Guo.
Antes ang pahayag ni Remulla, matandaan nga si Justice Undersecretary Nicky Ty ang nagpahayag nga pwede mangin state witness si Sheila.
“Kasi kung tutuusin mo, hindi naman siya ‘yung pinaka may pakana nitong illegal na bagay. Kung maniniwala tayo kahapon sa mga asta niya eh parang nadamay lang siya or napahamak lang siya ng mga kasamahan niya,” kabahin sang pahayag ni Ty.
