ILOILO CITY- Ginalantaw sang Iloilo City Government nga mangin disbentaha sa syudad ang proposal sang Aboitiz Group para sa Public Private Partnership (PPP) sa bulk water supply.
Sa interview sang Bombo Radyo kay Iloilo City Public Private Partnership Committee Chairman Atty. David Abraham Garcia, iya ginpahayag nga sa amo nga proposal nasaad nga magakuha ang syudad sang water rights kag kon indi ini matuman, may gahum ang kumpaniya nga i-terminate ang kontrata pati na ang pagpabayad sa syudad sang termination fee.
Suno kay Garcia, magasukot man ang kumpaniya sang P51.00 per cubic meter sang tubig kag ini ang doble pa sa P22.00 per cubic meter nga ginahatag sang Metro Pacific Iloilo Water (MPIW) sa mga konsumidor.
Ginpaathag man ni Garcia nga wala sang kaugalingon nga source sang tubig ang syudad kag kinahanglan pa nga mag-apply agud makakuha sang water rights gani indi ini mangin mahapos nga sistema.
Nahibaluan nga nabutang sa kontrata nga 80 million litres per day (80 MLD) ang kuhaon nga water rights sang syudad sa Jalaur River Multipurpose Dam nga sa idalom sang pagdumalahan sang National Irrigation Administration.
Ang aplikasyon naman para sa water rights,suno kay David, ang kinahanglan nga mag-agi sa National Water Resources Board (NWRB).
Nahibaluan nga sang nabaton sang opisina ni Garcia ang kopya sang proposal sang Agusto 9, ginbasura ini sang nasambit nga kumitiba.
