Nagapakatig-a gihapon si anay Presidente Rodrigo Duterte nga magpakita sa hearing sang quad committee sa Kamara nga naangot sa kontrobersyal nga war on drugs.
Suno sa iya former spokesperson nga si Atty. Salvador Panelo, nagapanindugan si Duterte nga indi ini magkadto sa hearing bangud lapason lamang ang iya nga tawhanon nga kinamatarong.
Gin-cite ni Panelo ang statement ni Duterte nga wala sang pulos ang hearing bangud indi man siya pagpahambalon, kag kun pahambalon man, punggan siya sa iya ipahayag.
Ini nga joint investigation sa Kamara ang nagatutok sa illegal activities sa Philippine offshore gaming operators (Pogo), illegal drug trade, kag drug war sang anay Duterte administration.
Sang Hunyo, matandaan nga una na nagpahayag ang former president nga magasipot lamang siya sa hearing sa korte kag indi sa iya sang lower chamber.
Sini lang nga Agusto, sunod-sunod nga mga pasabog ang ginpangbulgar sa hearings sang quad committee.
Sa una nga hearing, nagpungko ang anay intelligence officer sang Bureau of Customs nga si Jimmy Guban. Gintudlo sini sanday Paolo Duterte, bana ni VP Sara nga si Mans Carpio, kag si former presidential adviser Michael Yang nga amo ang tag-iya sang P11-billion nga shipment sang iligal nga droga nga nakumpiskar sa Manila sang 2018.
Sa sunod nga hearing, duha naman ka inmates ang nagbulgar nga si former President Duterte ang nagmandu nga patyon ang tatlo ka Chinese drug lords sa presuhan sa Davao sang tion pa sang iya administrasyon.
Sang nagligad lamang nga Agusto 28, nagpungko pa gid bilang resource person ang central figure sa drug war nga si Police Col. Jovie Espenido kun sa diin ginbuyagyag sini ang mga “kill” quota kag reward system sa PNP sa idalom anay sang administrasyon ni Bato Dela Rosa.
Ini nga quad committee nga naga-imbestigar ang ginabug-usan sang committee on dangerous drugs; committee on public order and safety; committee on public accounts; kag ang committee on human rights.
