ILOILO CITY – Nagpatigayon sang silent rally ang mga transport groups halin sa Negros Occidental sa opisina sang Land Transportation Franchising and Regulatory Board sa Quintin Salas St, Jaro, Iloilo City agud pamatukan ang Public Transport Modernization Program.
Sa interview sang Bombo Radyo kay Lilian Sembrano, President sang Kabacod Negros Transport Organization (KNETCO), iya ginpahayag nga katuyuan nila nga ipanawagan sa gobyerno nga pamatian sa liwat ang ila hingyo nga pasugtan sila nga magbyahe apisar nga wala sila nakapa-consolidate ukon naka-upod sa kooperatiba.
Suno kay Sembrano, apat ka bulan sila nga wala na nakapa-renew sang ila prangkisa.
Ginpahayag sini nga halos 50% sang mga transport groups sa Bacolod City ang ginpasugtan sang local government unit (LGU) nga temporaryo nga magbyahe.
Apang agud indi sila sa ulihi mabutang sa alang-alang, ginpalab-ot sang LGU ang ila concern sa LTFRB Central Office.
Naistorya naman sini si LTFRB Region 6 Director Richard Osmeña kag sa iban pa nga opisyal ang ahensya sa diin ginpanugyanan ang mga ini nga magbalik sa ila LGU.
Gindugang man sini nga nagtukod sila sang Panay Negros United Transport Coalition agud mas mangin mabaskog pa ang ila panawagan sa gobyerno sa bulig man sang mga transport groups sa Iloilo nga nagapamatok man sa consolidation.
