ILOILO CITY- Nag-abiso ang Department of Migrant Workers Region 6 sa tanan nga luyag nga mag-apply sang trabaho sa luwas sang pungsod nga mangin mahalong sa recruitment ukon manning agency nga palapitan.
Sa interview sang Bombo Radyo kay Glenda M. Aligonza, regional director sang Department of Migrant Workers Region 6, iya ginpahayag nga ini agud malikawan nga mabiktima sang illegal recruitment agencies.
Gintuad ni Aligonza nga may yara sila sang nabaton nga reklamo batok sa isa ka online recruitment activity apang padayon pa ang imbestigasyon tuhoy diri.
Nagpanugyan man ini sa mga biktima sang illegal nga recruitment agencies nga mag-file gid sang reklamo sa ila opisina agud mahatagan sang atensyon kag mabuligan nila.
Dugang sang natungdan nga sarang malantaw ang listahan sang mga rehistrado nga recruitment agencies sa website sang ahensya.
Padayon naman ang ila monitoring sa mga recruitment activities sang mga lisensyado nga recruitment agencies sa Western Visayas.
