Wala gihapon sang makuha nga maathag nga sabat ang Kamara halin kay Cassandra Li Ong nga amo ang authorized representative sang Philippine Offshore Gaming Operator (POGO) firm nga Lucky South 99.
Sa House investigation, ginprangka sang mga mamalidha ang 24-anyos nga nagaguwa nga isa siya ka “dummy” bangud sa dalagku nga cheke nga iya gin-isyu sa mga indibidwal, nagbayad sang $500,000 sa dues sa state-run regulator nga Philippine Amusement and Gaming Corporation (Pagcor) para sa Lucky South 99, kag nagpanag-iya man sang 58% sang Whirlwind Corporation nga amo ang nagpaarkila sang duta kun sa diin nagatindog ang Lucky South 99 sa Porac, Pampanga.
Apang sulit-sulit lang nga ginsiling ni Cassy nga indi siya front sang mga indibidwal nga nagahimo sang iligal nga aktibidad.
“Sa lahat ng question na po, hindi po ako dummy,” pahayag sini kag padayon nga nagalungo-lungo.
Indi man ini makaako kun nagabayad ini sang income tax return kag nagpamalibad nga magbuyagyag sang mga impormasyon.
Ginprangka man sini si House public order and safety panel chairperson kag Laguna lawmaker Dan Fernandez nga atubangon niya na lang ang kaso sa korte pananglitan may ipasaka sa iya.
“You’re handling so much money and you don’t have a simple income tax return. You should just tell the truth here because we are the only ones who can help you out here,” pahayag ni Fernandez.
Ginpamangkot pa si Ong sa isa ka certain Rainier Tiu apang nagpamalibad ini nga magsabat.
Sunod nga gin-excuse si Ong sa proceedings bangud naglain ang pamatyag sini bangud sa low blood sugar. Ginkumpirma man sang resident medical team sang Kamara nga nagnubo gid man sa 80/40 ang blood pressure ni Ong kag gin-require ini sang hospital confinement.
Sunod nga gin-excuse si Ong sa proceedings para sa bilog nga adlaw.#
