Kun bata gani ang dal-on sa dental clinic, pat-od nga malawig pa nga istoryahanay kag paathag ang kinahanglan antes ini mag-behave samtang ginagabutan sang ngipon.
Kun medyo may buot na, syempre wala na ina sang gamo.. apang daw indi man halandumon nga matabo sa bisan sin-o nga hamtong nga tawo ang kaangay sa na-abtan sang isa ka lalaki sa China.
Ini amo si Huang nga nga nagkadto sa clinic sa Yongkang City, Zhejiang Province, China.
Sa isa lang ka session, 23 sa iya ngipon ang gingabot kag ginbutangan sang 12 ka bag-o nga bulos!
Natabo ini sang nagligad lamang nga Agusto 15, apang makaligad nga 13 ka adlaw, sa masubo nga bahin, napatay gid ang lalaki.
Sunod nga nagpalapit ang iya anak sa Municipal Health Bureau agud mag-file sang reklamo.
Ginsiling sini nga pagkatapos sang session sa dental clinic, adlaw-adlaw na nga nagapalanakit ang bibig sang amay tubtub nga gin-atake ini sa korason sang Agusto 28 kag nangin rason sang iya kamatayon.
Nagpaathag naman ang dental clinic nga gin-determina sang dentista ang numero sang ngipon nga gabuton paagi sa face-to-face consultation kag physical condition sang pasyente.
Ginsiling man nila nga ang nangamot sa procedure amo ang isa ka dentist nga may lima ka tuig naman nga eksperyensya sa dental practice kag nalakip sa iya nga espesyalisasyon amo ang root canal treatment, removal sang impacted wisdom teeth, kag full dentures.
Nagpaathag naman ang Oral Medicine Center sang Wuhan Fourth Hospital nga apisar wala sang specific regulation kun pila ka ngipon ang gabuton sa kada session, maathag nga sobra-sobra ang 23 sa isa lang ka pagpungko.
Tubtub subong gina-imbestigaran pa ang amo nga kaso ilabi na bangud may nagapanindugan man nga lain ang rason sang kamatayon sang pasyente. Ginrason sang iban nga halos duha ka semana pa ang nagligad halin sa kontrobersyal nga dental procedure antes ginbawian sang kabuhi ang amo nga lalaki.#
(Photo courtesy of The Paper)
