ILOILO CITY- Ginplastar sang isa ka human rights lawyer nga indi makabig nga ‘voluntary surrender’ ang ginhimo sang pugante nga pastor, leader kag founder sang Kingdom of Jesus Christ, kag self-proclaimed Appointed Son of God nga si Apollo Quiboloy.
Sa interview sang Bombo Radyo kay Atty. Jobert Pahilga, iya ginpahayag nga base sa layi, ang voluntary surrender nagakahulugan nga talunsay lamang ini kag wala sang ginapangayo nga kondisyon.
Sa bahin ni Quiboloy, pila sa iya ginplastar nga kondisyon para sa iya pag-surrender ang nagalakip sang assurance halin sa Malacañang nga indi siya pag-iextradite sa United States kun sa diin siya may kaso nga sex trafficking of children.
Suno kay Pahilga, bisan pa ipakigbato sa korte sang kampo ni Quiboloy nga ‘voluntary surrender’ ang ginhimo niya agud mangin mitigating circumstance para mapanubo ang iya penalidad, apang kun ma-convict ini sa kaso nga qualified human trafficking, sentensiyahan ini gihapon sang life imprisonment.
Paathag sang abogado, sa amo nga kaso, indi mahimo nga ma-reduce ang penalidad gani indi sa gihapon applicable ang mitigating circumstance.
Matandaan nga una ginsiling ni Interior Secretary Benhur Abalos nga naaresto sang otoridad si Quiboloy.
Ginbali naman ini sang abogodo ni Quiboloy nga si Ferdinand Topacio nga boluntaryo nga nag-surrender ini sa Armed Forces of the Philippines particular ang Intelligence Service of the Armed Forces ukon ISAFP.
