Ginselebrar ni President Ferdinand Marcos, Jr. ang iya ika-67 nga kaadlawan kadungan sang pagsug-alaw sa isa man ka maayo nga balita nga amo ang double-digit increase sa satisfaction rating sa iya administrasyon sa second quarter sang 2024.
Base sa resulta sang survey sang Social Weather Stations (SWS) nga ginpatigayon sang Hunyo 23-Hulyo 1, may 11 puntos nga pagsaka sa satisfaction rating para sa Marcos administration.
Sa non-commissioned survey, 62 percent sang adult Filipinos ang satisfied, 15 percent ang indi satisfied apang indi man dissatisfied, samtang 22 percent naman ang wala gid nanamian sa general performance sang gobyerno.
Ang net satisfaction rating nga 40 points ang gina-classify na sang SWS nga “good” nga makabig naman nga improvement sa 29 points nga rating sang Marso nga napaidalom naman sa “moderate” category.
Apang mas manubo gihapon ang 40 points ipaanggid sa +52 nga “excellent” rating nga nakuha ni Marcos sang December 2023.
Sa second quarter, “excellent” ang net satisfaction rating sa presidente sa Metro Manila nga may 52 points; “good” sa Balance Luzon kag Visayas nga may 48 kag 32 points, samtang “moderate” naman sa Mindanao nga may 25 points.
Ginpatigayon ini nga survey paagi sa face-to-face interviews sa 1,500 adults sa bilog nga pungsod nga may 600 sa Balance Luzon kag tag-300 sa Metro Manila, Visayas, kag Mindanao.
Naggamit man ang survey sang sampling error margins nga ±2.5% sa national percentages, ±4.0% sa Balance Luzon, kag ±5.7% (each) sa Metro Manila, Visayas, kag sa Mindanao.#
