Nahimo na nga tropical depression ang Low Pressure Area (LPA) nga yara sa guwa sang Philippine Area of Responsibility (PAR).
Base sa 11:00 nga bulletin sang Philippine Atmospheric, Geophysical and Astronomical Services Administration (PAGASA), ulihi nakit-an ang sentro sang bagyo sa kalayuon nga 2,165 km nasidlangan sang Southeastern Luzon.
Dala sini ang kabaskugon sang hangin nga 45 km/h malapit sa sentro kag pagmadlos nga tubtub sa 55 km/h. Nagahulag ini sa direksyon nga pa-nakatundan naaminhan nakatundan sa kadasigon nga 20 km/h.
Base sa track forecast, ini nga tropical depression ang magahulag sa direksyon nga pa-nasidlangan naaminhan-nasidlangan sa masunod nga 12 ka oras antes ini magliso sa direksyon nga naaminhan naaminhan-nakatundan pakadto sa naaminhan-nakatundan umpisa buwas sa gab-i tubtub sa Martes sang gab-i.
Ginalantaw nga magasulod ang bagyo sa PAR sa Martes sang gab-i kag magaguwa man gilayon sa Pilipinas sa Miyerkules sang aga, Septyembre 18.
Maga-lain pa ang forecast time sang pagsulod kag pagguwa sini sa PAR depende sa hulag sang weather disturbance sa masunod nga 12 ka oras.
Gina-forecast man sang weather bureau nga mahimo ini nga tropical storm buwas sa hapon ukon sa gab-i kag posible man nga magbaskog pa bangud yara pa subong ang weather disturbance sa Pacific Ocean.
Base sa track scenario subong, ginalantaw nga wala man sang direkta nga epekto ang tropical depression sa diin man nga bahin sang Pilipinas sa bilog nga forecast period.
Sa pihak nga bahin, ang isa pa gid ka LPA nga yara sa kalayuon nga 430 km east sang Casiguran, Aurora ang may mataas man nga tyansa nga mangin bagyo sa masunod nga 24 oras kag posible nga mag-landfall sa northern portion sang Luzon sa masunod nga adlaw.
Bangud sini nga developments, gina-abisuhan sang PAGASA ang public and disaster risk reduction and management offices nga mag-aligmat kag magpadayon sa pag-monitor sa lakat sang panahon agud nga mapaalerto man ang mga residente sa ila tagsa ka hurisdiksyon.
