Gin-ako sang Iloilo Electric Cooperatives nga wala sila ginpahibalo sang National Grid Corporation of the Philippines (NGCP) tuhoy sa line rental nga nagdugang sa balaydan sa bill sang kuryente sa mga konsumidor kasunod sang pagtaas sang electricity rate sa probinsya sang Iloilo.
Suno kay Engr. Mike Paguntalan, General Manager sang ILECO I, labing una ini nga natabo sa operation sang kooperatiba nga mas mataas pa ang sukot sa line rental nga P7.88/kwh ipaanggid sa generation charge nga P6.47/kwh.
Pahayag niya, ang NGCP kuntani ang makapaathag tuhoy sa line rental kag ang ginahatag nga rason nga bangud sa line congestion apang nagapabilin na lang ini nga kwestyon bangud wala man sang presensya sang NGCP sa committee hearing.
Dugang pa sang natungdan, collection agent lamang ang tanan nga electric cooperatives sang government taxes, transmission charges kag generation charges.
