Natalana nga ihawon ang 200 ka mga elepante sa Zimbabwe agud mapanagtag ang karne sa ginagutom nga mga residente.
Ini kasunod sang epekto sang El Niño sa 68-million ka mga tawo sa southern Africa nga rason sang pagkulang sang pagkaon sa rehiyon.
Ginkumpirma sang Zimbabwe Parks and Wildlife Authority ang plano sang pungsod kag ginpahayag man nga ginatun-an na subong ang mga plano kun paano ini himuon.
Pananglitan matigayon na ini sa Hwange, Mbire, Tsholotsho kag Chiredzi districts, ini ang labing-una nga tion sa sulod sang 1988 nga may mga ihawon nga elepante sa amo nga pungsod.
Pareho man ini sa desisyon sang Namibia sang nagligad nga bulan sa 83 ka mga elepante kag ginpang-tagtag man ang karne sa mga tawo nga naapektuhan sang gutom.
Pareho man ang duha ka nasyon sa Africa nga nagdeklarar sang state of emergency bangud sa drought.
Nahibaluan nga masobra 200,000 ang elepante nga nagakabuhi sa conservation area sa lima ka southern African countries – Zimbabwe, Zambia, Botswana, Angola kag Namibia – nga amo ang nagahimo sa rehiyon bilang puluy-an sang isa sa pinakadaku nga elephant populations sa kalibutan.
Magluwas nga mabulong ang kagutom sang komunidad, kabahin man ini sang lihok agud nga ma-decongest ang ila mga parke nga maka-sustain lamang sang 55,000 elephants. Sa subong, ang Zimbabwe ang may yara sang masobra 84,000 ka mga elepante.
