Magapadala liwat ang quad committee sang imbitasyon kay former president Rodrigo Duterte nga magtambong sa hearing kaangot sa ginaalegar nga extrajudicial killings sang ginpatuman sini ang war on drugs.
Ang development nga ini ang kasunod sang mga pahayag ni anay Iloilo City Mayor Jed Mabilog kun sa diin lakip sa namensyonar amo ang pagbutang sang iya pangalan sa narcolist bangud wala sini ginsuportahan si Duterte sa 2016 elections.
Gin-alegar man ni Mabilog nga ginpatawag siya ni anay PNP chief Ronald “Bato” Dela Rosa sa Camp Crame nga pananglitan gintuman niya, mahimo nga mabutang gid sa risgo ang iya kabuhi.
Suno naman kay Manila Rep. Benny Abante nga co-chairman sang quad committee, tinguhaan nila nga mapakadto ang former president agud mabatian man ang iya mga sabat.
“We are trying to invite the former president to appear before the committee para sagutin niya ang mga bagay na ito. Sapagkat pinagbintangan siya ng ilan sa mga witness naming, I think he is the only one that can actually clear his name,” pahayag sang mamalidha.
Ginsulit ni Abante nga magahatag ang Kamara sang courtesy sa former president kag indi ini pag-i-cite in contempt kag indi man sila mag-isyu sang show cause order pananglitan mangindi ini sa imbestigasyon.
Nahibaluan nga pareho na nga naimbitar sanday Bato kag Duterte apang pareho man sila nga nagpangindi sa pagkadto sa hearing sang quad comm.
Ginpahayag ni Abante nga nagapati ang House joint committee nga indi involved sa iligal nga droga si Mabilog kag dapat manabat ang tawo nga nag-frame sa iya.
Gindugang sini nga ang imbitasyon nila kay Duterte ang nagatuyo nga mahibaluan kun sin-o ang mastermind sa extrajudicial killings sang gin-implementar ang war on drugs.
“We are not considering him as a perpetrator or accused. We would like him (Duterte) to clear to us itong nangyaring war on drugs, kung saan libo-libo ang pinatay, namatay at pinagbintangan,” dugang sini.#
