Masobra sa 1,000 Filipinos sa Lebanon ang nagpangayo sang bulig sa Philippine government agud ma-repatriate bangud sa kinagamo sa tunga sang Israel kag Hezbollah.
Suno sa Department of Foreign Affairs (DFA), 500 na ang nakapauli sa Pilipinas kag may 1,000 nga ginaproseso agud makapauli.
Ginpahayag ni DFA Assistant Secretary Robert Ferrer nga ginapangabay gid nila sa tanan nga Filipinos sa Lebanon nga mag-avail sang voluntary repatriation program samtang may commercial flights pa nga available kag stable pa ang sitwasyon sa Beirut.
Dugang sang DFA, may iban pa nga Filipinos nga wala sang plano nga magbalik sa Pilipinas apang ginsiling sini nga ginatuyo sang Philippine Embassy sa Beirut nga magpatigayon sang mass repatriation kun maglala ang sitwasyon.
Nagahingyo man ini sa mga pamilya sang mga OFWs nga sila mismo ang magpilit sa ila himata sa Lebanon nga magpauli na lang sa Pilipinas.
Ginpasiguro naman sang ahensya nga ang embassy ang magabulig sa mga OFWs nga may yara sang immigration kag visa issues.
Nagapabilin subong ang Lebanon sa Alert Level 3, nga nagapanawagan sang voluntary repatriation.
