Nag-file sang disbarment complaint sa Korte Suprema batok kay anay presidential spokesperson Atty. Harry Roque ang anay opisyal sa Duterte administration.
Suno kay Atty. Melvin Matibag, nagserbe nga acting Cabinet secretary sa Duterte administration, ang reklamo nga ginpasaka niya batok kay Roque ang may kaangtanan sa ginpost sini sa social media.
Suno kay Matibag, nag-post si Roque sa social media sang “deep fake” video ni Presidente Ferdinand Marcos Jr. nga nagapakita nga nagagamit ni sang ilegal nga droga nga nag-viral sang Hulyo.
Una na nga ginpahayag sang otoridad nga nag-check sa video nga hindi si Marcos ang lalaki.
Wala naman gindetalye ni Matibag ang kabilugan nga reklamo niya batok kay Roque bangud sa “subjudice” rule.
Gintawag ni Roque nga “desperate act of attention” ang reklamo ni Matibag.
Suno sa iya, isyu sang national security ang video.
Pahayag ni Roque, ang video ang rason kun ngaa ginadumtan siya sang Quad Committee sa Kamara de Representantes.
Dugang niya, wala man dapat ginasapubliko ang disbarment complaints.
Ginapangita subong sang otoridad si Roque para iserbe sa iya ang arrest warrant matapos nga gin-contempt sang committee bangud napaslawan nga ipasa sa mga mamalidha ang mga dokumento nga nagapamatuod sang pagdamo sang manggad sang iya nga pamilya.
Nag-file naman sang petisyon ang kampo ni Roque sa SC batok sa amo nga arrest order.
