Ginplastar sang Iloilo City Police Office (ICPO) nga isa gihapon ka pagpanghangkat ang pagtutok sa mga kabataan nga naga-ginamo sa syudad apisar nga may nakit-an nga pagnubo sa numero sang kaangay sini nga mga insidente subong nga tuig.
Sa interview sang Bombo Radyo kay Police Major Shella Mae Sangrines, spokesperson sang opisina, iya ginpahayag nga may mga kabataan sa gihapon nga ginahulat lang nga makahalin ang pulis ukon sin-o man nga bantay kag gilayon man nga nagapasaway.
Partikular sini nga gintumod ang baybayon sa Boulevard, Molo kun sa diin may natabo nga stabbing incident sang nagligad nga semana.
Duha ka 13-anyos nga lalaki kag isa ka 15-anyos nga lunsay mga taga-North Baluarte, Molo ang nabun-an; samtang ang mga ginatudlo nga suspek naman ang naga-edad 18 kag 16 anyos.
Suno kay Sangrines, nagakawad-an sang personnel sa amo nga lugar kun may mga follow-up sila ukon ginahingagaw nga mga
operasyon nga kinahanglan ang ila presensya.
Pahayag sang natungdan, manageable na ang mga kaangay nga insidente santo sa record sang Women and Children’s Protection Desk.
Sa pihak sini, ginalantaw nga dapat padayunon sang pulis, barangay officials kag partner agencies ang mga programa kag intervention nga nagatutok sa ikaayo sang mga menor de edad.
