Ginplastar ni Department of National Defense (DND) Secretary Gilberto Teodoro Jr. nga dapat amyendahan na sang Kongreso ang espionage laws agud nga mapahanugutan ang gobyerno nga silutan ang mapamatud-an nga naga-espiya sa Pilipinas indi lamang sa tyempo nga may giyera kundi pati sa malinong nga mga tinion.
Lakip ini sa ginpahayag ni Teodoro sang ginpamangkot kaangot sa nabuhi liwat nga alegasyon nga isa ka Chinese spy si dismissed Bamban, Tarlac Mayor Alice Guo ukon si Guo Hua Ping.
“Urgent” ang pagkinahanglan nga amyendaran ang layi suno sa tiglikom.
“Ang mahalaga ngayon parusahan natin ang espionage sa panahon ng peace kasi ang espionage law sa Pilipinas ay epektibo lamang during times of war,” pahayag sini. “So call to action din, alam naman na ng ating mga mambabatas, na agaran nilang amyendahan yung espionage law para maparusahan at makakilos ang gobyerno nang tama para sugpuin ito.”
Matandaan nga sang nagligad nga semana, ginpresentar sa hearing sang House Quad Committee ang isa ka dokumentaryo sang English News Channel nga Al Jazeera kun sa diin gin-feature ang isa ka Chinese gambling tycoon nga preso subong sa Thailand.
Ini amo si She Zhijiang nga nag-claim nga isa siya ka agent sang People’s Republic of China – Ministry of State Security kag na-recruit siya sang 2016 sang isa ka lalaki nga nakilala niya sa Pilipinas.
Suno kay She, nag-promisa ang lalaki nga buligan siya sa iya nga kaso sa kondisyon nga mag-trabaho siya bilang spy sang China.
Paagi sa iya custodian, naghatag si She sang access para mabuksan ang pila ka files nga nagapamatuod sa iya alegasyon nga isa siya ka Chinese spy.
Sa mga dokumento nga ginpakita sini nakabutang pati ang pangalan ni Guo Hua Ping nga amo ang pangalan ni dismissed Mayor Guo, nga anak ni certain Lin Wen Yi nga amo man ang Chinese nga babaye nga nabuyagyag paagi sa Senate hearings sang ginabukad ang identity ni Guo.
Ini nga alegasyon ang ginpanginwala ni Guo sang nag-atubang na siya sa Kamara kag nagsiling nga maga-file siya sang kaso batok sa self-confessed Chinese spy.
Nahibaluan nga nagapangatubang ang dismissed mayor sang kaso nga graft, qualified human trafficking, money laundering, kag tax evasion, kag sa subong, preso ini sa Pasig City Jail.#
