Nagpaulan ang Iran sang ballistic missiles sa Israel bilang balos sa kampanya sini batok sa Hezbollah sa Lebanon.
Ginabanta nga 200 ka missiles ang ginlunsar sang Iran.
Antes sini, nag-anunsyo na nga daan ang militar sang Israel sa posible ballistic missile strike halin sa Iran kag ginpaandaman ang publiko nga magpanago sa hilway nga lugar sa tion sang pagpang-atake.
Una na nagpromisa ang Iran nga magabalos sila kasunod sang atake sang Israel nga nagpatay sa top leader sang Hezbollah.
Ang kampanya sang Israel sa Lebanon ang ginakabig pinakadako nga escalation sang regional warfare humalin sang naglupok ang inaway sa Gaza sang nagligad nga tuig.
Ginsiling naman sang Israel nga wala sang seryoso nga casualties ang na-report.
Gilayon naman nga nag-isyu ang Philippine Embassy sa Israel sang advisory sa local Filipino community nga magsulod sa protected space kasunod sang pagpaulan sang missiles sang Iranian government.
Ginpanugyan man sang Embassy sa mga Pinoy nga magsunod sa mga mando sang Home Front Command.
