ILOILO CITY – Padayon pa ang ginahimo nga imbestigasyon sang Commission on Elections (COMELEC) sa natabo nga inaway sa tunga nanday San Joaquin, Iloilo Mayor Ninfa Garin kag Vice Mayor Marvigrace Lago-Getuya sa gwa mismo sang munisipyo.
Nahibaluan nga hinablos ni Garin si Getuya bangud pakaisa sang alkalde ang iloy sang bise alkalde.
Sa interview sang Bombo Radyo kay Atty. Reinier Layson, Provincial Election Supervisor sang COMELEC-Iloilo, iya ginpahayag nga ginmanduan na sini ang election officer sa San Joaquin nga imbestigaran ang natabo.
Nagpangabay man si Layson sa mga politiko nga likawan ang pag-ilinaway kag indi magpadala sa emosyon.
“Wala kita sang problema sa probinsya, except sa San Joaquin although it happened outside sa office sang COMELEC. We are closing monitoring sang sitwasyon didto kag ginapa-imbestigaran ko man sa akon election officer sa San Joaquin.”
Sa tion nga matapos na ang imbestigasyon, diri kag makadesisyon ang COMELEC kun ipaidalom bilang isa sa mga ‘areas of concern’ ang banwa sang San Joaquin.
Kun balikan, sa video nga ginpadala sa Bombo Radyo, makita nga ginsaruso ni Mayor Garin si Vice Mayor Getuya.
Diri kag ginsukmaan sang ni Mayor Garin si Vice Mayor Getuya kun sin-o ini kag ano lang ini sang una.
“Sin-o ikaw? Sin-o ikaw kauna? Intindihan mo ako?”
Natabo ang pag-inaway sang magtiya matapos nag-file sang iya certificate of candidacy (COC) si Mayoral Candidate former Sangguniang Bayan Member Atty. Joe Abad Lazaro nga ginasuportahan ni Vice Mayor Getuya.
Samtang si Mayor Garin naman ang nagasuporta sa iya hinablos nga si 1st District Board Member Valentine Serag nga mapadalagan bilang alkalde bunggo kay Lazaro.
Nahibaluan nga ang tatay ni Board Member Serag ang utod ni Mayor Garin.
Magluwas sa bise alkalde, nagbaisay man sanday Mayor Garin kag pakaisa sini nga iloy ni Vice Mayor Getuya.
