Nagdaog ang 2024 Champions nga Boston Celtics sa imbukada nga hampang sa National Basketball Association (NBA) preseason batok sa Denver Nuggets nga kampyon naman sang 2023.
Nakuha sang Celtics ang 107-103 nga kadalag-an sa Etihad Arena sa Abu Dhabi nga kapital sang United Arab Emirates.
Nanguna si Payton Pritchard sa players nga may 21 points kun sa diin napasulod sini ang anum sa 12 ka tres.
Naka-12 puntos naman si Jayson Tatum kag may eight points si Jaylen Brown sa 19 minutos nga hampang sa court antes sila naghatag ligwa sa backups.
Magluwas sini nga international preseason game, magaatubangay pa liwat ang duha ka teams sa Etihad Arena buwas, Oktubre 6 (petsa sa Pilipinas).
Nagapanguna sa Nuggets ang Serbian superstar nga si Nikola Jokic nga three-time MVP kag ang Canadian guard nga si Jamal Murray.
Nagdugang sa ila puwersa ang veteran guard kag nine-time All-Star nga si Russell Westbrook kag isa pa ka Balkan nga si Dario Saric.
Preska naman ang Boston sa panibag-o nga record sang nakuha sini ang ila ika-18 na nga korona sa NBA nga una man nga titulo halin sang 2008 sang ginporma na ang super team nanday star forwards Jayson Tatum kag Jaylen Brown kag guards nga sanday Jrue Holiday kag Derrick White kag ang Latvian Center nga si Kristaps Porzingis.#
