Gin-postpone ang arraignment ni former Iloilo City Mayor Jed Patrick Mabilog sa Sandiganbayan subong nga adlaw.
Ini matapos nag-file sang motion to quash ang kampo sang anay alkalde.
Ang motion to quash ang tawag sa pamaagi agud mabasura ang kaso kriminal.
Katuyuan sini nga ideklarar sang korte nga invalid ukon void ang subpoena, arrest warrant, ukon legal complaint.
Diri kag i-review sang korte ang mga argumento kag ebidensya nga ginpresentar sang kampo ni Mabilog.
Matapos sini, madesisyon ang korte kun bala granted ukon denied ang motion.
Nahibaluan nga kahapon nag-file sang motion to quash ang kampo ni Mabilog, apang subong lang nga adlaw nabaton sang
prosecution ang kopya.
Ginhatagan naman si Prosecution Justice Amparo Cabotaje-Tang sang tubtob sa Oktubre 18, 2024 agud magpasa sang ila paathag.
Gintalana naman sa Nobyembre 22 ang arraignment ni Mabilog.
Ang kaso ang ginpasaka nanday former Iloilo City Councilor Plaridel Nava II kag anay Iloilo Provincial administrator Manuel Mejorada sang 2015.
Gin-akusaran nila si Mabilog sang grave misconduct, dishonesty, kag conduct prejudicial to the best interest of the service bangud sa paghatag sang lloilo City government sang kontrata sa 3L Towing Services nga wala nag-agi sa public bidding.
Nahibaluan nga indi mahimo makapadalagan si Mabilog sa anuman nga local elective office bangud sa ginapagwa nga dismissal order halin sa Ombudsman sa diin ang accessory penalty amo ang perpetual disqualification to hold public office.
Gindepensa man ni Mabilog nga ginpagwa ang desisyon sang wala ini sa Pilipinas matapos nagpaidalom sa asylum bangud sa pamahog sa iya kabuhi sa tion sang Duterte administration.
Una diri, gintuyo kuntani ni Mabilog nga magpadalagan sa 2025 elections, apang sa ulihi, nagdesisyon ini nga indi na niya pagdayunon ang iya plano.
