Nakabalik na sa Pilipinas si President Ferdinand “Bongbong” Marcos Jr. matapos ang pagtambong sa 44th kag 45th Association of Southeast Asian Nations (ASEAN) Summit and Related Summits sa Vientiane, Laos.
Naghugpa ang presidential plane sa Villamor Air Base 10:23 kagab-i, Oktubre 11.
Sa iya arrival statement, ginpadayaw sang presidente ang produktibo nga mga inadlaw sini sa Laos lakip na ang diskusyon kaupod sa iban nga Southeast Asian leaders.
Ginkasugtan suno kay Marcos nga magbinuligay sa pag-promote sang sustainable agriculture, pagtib-ong sang micro, small and medium enterprises (MSME), kag pag-suporta sa digital transformation sang mga ekonomiya kag sustainable tourism sa rehiyon.
Ginsiling man sini nga nagapanguna man ang Pilipinas sa mga inisyatibo nga naangot sa climate change kag climate resilience bilang host sang Loss and Damage Fund Board. Sa Oktubre 14-18, maga-host ang pungsod sang Asia-Pacific Ministerial Conference on Disaster Risk Reduction agud nga maka-kooperar sa iban nga mga nasyon kaangot sa preparasyon kag response sa mga kalamidad.
Lakip man sa naistoryahan sang ASEAN leaders amo ang mga dalagku nga international issues kaangay sang West Philippine Sea.
Suno sa chief executive, ginpahangop gid sini sa atubang sang iban nga lideres nga magapadayon ang Pilipinas sa pag-depensa sa soberanya sini, sovereign rights, kag hurisdiksyon.
Sa sidelines sang summit, nakapakigkita man si Marcos sa iban nga world leaders para maistoryahan ang bilateral cooperation kag strategic areas nga may kapareho nga interes sa Pilipinas. Lakip sa iya naistorya amo si Canadian Prime Minister Justin Trudeau kag mga lider sang Lao PDR, European Union kag Japan.
Ginpasalamatan man ni Marcos ang gobyerno sang Lao PDR sa pag-host sang ASEAN summit subong nga tuig. Sa Malaysia naman patigayunon ang kaangay nga kahiwatan sa 2025.#
