ILOILO CITY-Pagahiwaton sa siyudad sang Iloilo ang pinakadako nga dairy event ukon National Dairy Summit 2024 nga may tema “Advancing DAIRYpreneurship, Innovation, Nutrition, Sustainability, and Food Security” sang National Dairy Authority (NDA) sa Oktubre 28 tubtob 30 sa Iloilo Convention Center, Iloilo City.
Sa interview sang Bombo Radyo kay Mr. Vicente Bitolinamisa III, OIC Department Manager sang NDA Western Visayas, iya ginpahayag nga ang 2024 National Dairy Summit indi lamang isa ka kahiwatan nga nagapakita sang pinakabag-o nga mga inobasyon, mga produkto, kag mga serbisyo sa industriya sang gatas kundi nagaserbe man nga isa ka maayo nga plataporma para sa mga stakeholders nga magkonektar, magbuligay, kag mag-usisa sang bag-o nga mga oportunidad sa negosyo.
Ang summit bukas sa tanan nga mga partisipante sa dairy value chain, lakip ang mga mangunguma, mga stakeholders, mga lokal nga gobyerno (LGUs), mga unibersidad kag kolehiyo sang estado (SUCs), mga processors, mga suppliers,mga negosyante, kag mga dairy partner agencies.
Suno kay Bitolinamisa, sa amo nga kahiwatan dako gid nga bulig sa pag-uswag sang produksyon sang gatas, indi lang sa Western Visayas kundi sa bug-os nga Pilipinas.
Kaangot diri, nagapanawagan man ang NDA sa mga luyag pa nga magparehistro nga magbisita lang sa facebook page sang amo nga ahensya.
