Ginduso sang human rights lawyer kag anay Bayan Muna Rep. Neri Colmenares kay President Ferdinand Marcos Jr. nga ipasa sa International Criminal Court (ICC)ang sworn statements nanday retired police Col. Royina Garma kag self-confessed drug lord Kerwin Espinosa.
Ini ang kasunod sa mga ginpangbuyagyag sa quad committee sa Kamara kaangot sa extrajudicial killings nga natabo sang ginpatuman ang drug war ni anay Presidente Rodrigo Duterte.
Suno kay Colmenares nga isa sa mga abogado sang pila ka mga kaso sang mga biktima sang extrajudicial killings, ang mga testimoniya ang nakitaan sang “systematic pattern” sa pagpang-abuso sa tawhanon nga mga kinamatarong.
Dapat suno kay Colmenares nga ipakita ni Marcos nga wala ginatolerar sang iya adminitrasyon ang impunity.
Kun mapasa ang sworn statement nanday Garma kag Espinosa sa international court suno pa sa natungdan, mas mapabakod pa sini ang prosecution kay Duterte kag anay Philippine National Police (PNP) Chief kag subong senador Ronald ‘Bato’ Dela Rosa.
Matandaan nga si Garma nga ginasiling paborito nga pulis ni Duterte kag nakaserbe man anay sa Davao CityN ang nagkumpirma nga may yara sang reward system sa police officers nga involved sa pagpatay sa drug suspects.
Gin-ilog ini suno sa iya sa “Davao model” kun sa diin nagahalin ang padya sa P20,000 tubtub sa P1 million sa kada may mapatay nga drug suspect depende man sa ila klasipikasyon.
Sa statement naman ni Espinosa, ginsiling sini nga si Dela Rosa ang nagmandu sa iya nga itum-ok si anay senador Leila de Lima sa illegal drug trade bilang kabahin sang political demolition.
Abril 2022 sang ginbawi ni Espinosa ang iya mga statement batok kay De Lima kag nagsiling nga lunsay ini sala bangud resulta lamang ini sang pressure, pagpamilit, intimidasyon, kag mga pamahog sa iya kag sa iya pamilya sang amo nga tion.
Nagsabat naman si Senator Bato dela Rosa nga wala siya sang ihibalo sa ginwakal ni Garma nga “reward system” sa pagpatay sang drug suspects sa idalom sang Duterte administration.
Nagsiling man si Bato nga wala siya nagapati sa sini nga sistema bangud sinumpaan nga katungdanan sang pulis suno sa iya nga ipabilin nga drug-free ang lugar nga ila ginaserbisyuhan.#
