𝗜𝗟𝗢𝗜𝗟𝗢 𝗖𝗜𝗧𝗬 – Nakit-an nga buhi ang duha ka mga kabataan nga na-report nga missing sa Brgy. Baldoza, La Paz, Iloilo City.
Ini amo sanday John Ronald Linagad, 4, kag Camelle Zhynn Jareol, 5, lunsay residente sang Zone 3, Barangay Baldoza, La Paz.
Sa interview sang Bombo Radyo kay Rolly dela Cruz, nakakita sa duha ka mga bata, iya ginpahayag nga kagab-i pa lang, may nabatian siya nga nagapanuktok, apang wala man niya ini ginsapak.
Suno kay dela Cruz, kaina sang aga, nakita niya nga yara na sa gwa sang kotse ang iya speedometer.
Diri kag nagdumdom na ini nga may nagbukas sang iya kotse.
Sang iya ginpalapitan, nakita niya ang duha ka mga kabataan.
Ginbululigan naman sang mga residente sa lugar nga mabuka ang crystal sang kotse agud makagwa ang mga kabataan.
Nagalibog man ang ulo sini kun paano nakasulod ang mga kabataan sa sulod sang iya kotse bangud sirado ini.
Gindala naman sa ospital ang duha ka mga kabataan.
