Balantayan ang paglupok sang panibag-o kag dugang nga mga impormasyon sa quad committee sa Kamara matapos nagpahayag sang intensyon si former National Police Commission (NAPOLCOM) commissioner Edilberto Leonardo nga magkanta naman sa iya nahibaluan sa war on drugs sang anay Duterte administration.
Ini nga impormasyon ang kasunod sang natabo sang nagligad nga hearing kun sa diin ginbuyagyag ni former Philippine Charity Sweepstakes Office (PCSO) general manager kag retired Police Colonel Royina Garma ang cash rewards system sa drug war.
Suno kay Manila Rep. Bienvenido Abante nga chairman sang House Committee on Human Rights nga yara man sa quad committee, may inisyal na sila nga istoryahanay ni Leonardo kag nagpakita na ini sang intensyon nga maghatag sang testimoniya.
“We had an initial talk… He asked that we talk to him. Initially speaking, mayroon na siyang tinatawag na intensyon na, okay, sasabihin na niya ‘yung iba in detail,” suno kay Abante. “Although we are not sure about that. It’s up to him.”
Matandaan nga samtang nagapadayon ini nga imbestigasyon, nag-resign na si Leonardo sa NAPOLCOM kag ginbaton naman sang Malacañang ang iya desisyon.
Kun balikan, si Garma ang nagbuyagyag nga siya mismo ang nagmensyonar sang pangalan ni Leonardo kay anay Presidente Rodrigo Duterte sang nagpangita ini sang police officer nga miyembro sang Iglesia ni Cristo kag may ikasarang nga mag-implementar sang drug war sa “national scale.”
Ini nga drug war ang ginaalegar gin-ilog sa “Davao Template” kun sa diin may yara sang reward system.
Sa statement ni Garma, si Leonardo ang may yara sang “final authority” agud matumod kun sin-o ang ilakip sa lista sang drug personalities, i-classify sila kun ano ang ila nga threat levels, kag siya man ang may discretion kun sin-o ang ila kakason sa lista sang mga durugista.
Ginsiling naman ni Surigao del Norte Rep. Robert Ace Barbers, chairman sang House Committee on Public Order and Dangerous Drugs kag overall chairman sang quad comm, nga imbitahon man nila ang tanan nga personalidad nga ginmensyonar ni Garma kaangay sa former President, Senator Bong Go, Senator Ronald dela Rosa, kag certain Muking nga affiliated kay Bong Go sang siya pa ang Special Assistant to the President.#
