𝗜𝗟𝗢𝗜𝗟𝗢 𝗖𝗜𝗧𝗬 – Yara na sa maayo nga kondisyon ang duha ka mga kabataan nga na-report nga missing sa Brgy. Baldoza, La Paz, Iloilo City.
Ini amo sanday John Ronald Linagad, 3, kag Camelle Zhynn Jareol, 5, lunsay residente sang Zone 3, Barangay Baldoza, La Paz.
Nahibaluan nga Oktubre 12 sang gab-i sang nadula ang mga bata kag Oktubre 13 na sang aga sang nakit-an ang mga ini nga buhi sa sulod sang abandonado nga salakyan sa nasambit man nga lugar.
Sa interview sang Bombo Radyo kay Mary Grace Centino, Division Head sang Child and Youth Welfare and Development Program sang Iloilo City Social Welfare and Development Office, iya ginpahayag nga gintagaan nila sang vitamins ang duha ka mga kabataan.
Suno kay Centino, nagbatyag sang pagpalanakit sang tiyan ang bata nga babaye bangud sa possible pag-inom sini sang tubig ulan.
Samtang ang bata naman nga lalaki ang wala man sang ginabatyag sa lawas.
Matandaan nga gintuad sang bata nga lalaki nga isa ka ginapahayag ‘aswang’ ang ginapatihan nagpakaon kag nagtanyag sa ila sang hampanganan.
Luyag kuntani sang iya mga kabataan nga magpauli na, apang indi man ang mga ini pagpapaulion sang mga indi makila-an nga mga tinuga.
