𝗜𝗟𝗢𝗜𝗟𝗢 𝗖𝗜𝗧𝗬- May Christmas gift ang Department of Public Works and Highways (DPWH) Region 6 sa mga motorista nga nagalabay sa kontrobersyal nga Ungka flyover.
Sa interview sang Bombo Radyo kay Ret. Police Major Uldarico Garbanzos, Head sang Iloilo City Traffic Management Unit, iya ginpahayag nga buksan na sa full capacity ang Ungka flyover sa Disyembre 25, 2024.
Kaangot sini, may ipatuman naman nga two-way traffic sa nawala nga portion sang Ungka Flyover kun padulong sa Pavia, Iloilo.
Ang duha ka lanes sa natuo nga porsyon ang siraduhon anay bangud maumpisa ang rectification works.
Buot silingon, ang mga motorista pasulod sa Pavia kag pasulod sa Iloilo City ang magalabay sa nawala nga porsyon sang flyover.
Magluwas sa rectification works, nag-request man sang permit ang Metro Pacific Iloilo Water agud nga mag-ilis sang ila nga pipeline sa Ungka sa diin ginhatagan sila sang 10 ka adlaw agud matapos ang ila trabaho.
Suno kay Garbanzos, magasapol anay ang ahensya, ang Iloilo City Traffic Management Unit kag Pavia Traffic Management Office agud makahatag sang tul-id nga petsa sa pagpatuman sang traffic scheme sa masunod nga semana.
Magalawig ang traffic scheme tubtob nga magbukas sa full capacity ang Ungka flyover.
Nahibaluan nga ang gasto sang gobyerno sa Ungka flyover ang nagdangat na sa P975 million halin sa original budget nga P680 million bangud sa ginapatigayon nga pagkaayo.
Ang contractor sang proyekto nga nagalaba sang 453.7 meters amo ang International Builders Corporation kag amo man sa gihapon ang nagdaog bilang contractor sa ikaduha nga phase sa pagkay-o sang flyover.
Katuyuan sini kuntani nga mapahagan-hagan ang trapiko sa intersection sang Sen. Benigno Aquino Jr. Avenue kag President Corazon Aquino Avenue nga nagakonekta sa Barangay Ungka, Jaro, Iloilo City padulong sa Barangay Ungka 2, Pavia, Iloilo, apang naghatag ini sang huol sa publiko bangud sa palpak nga proyekto.
