Ginbuksan na sang ASEAN Parliamentarians for Human Rights (APHR) ang imbestigasyon sa Pilipinas agud ma-assess ang epekto sang reclamation projects kag iban pa nga environmental challenges sa lokal nga mga komunidad kag marine resources sa pungsod.
Ini nga pagpangusisa ang kabahin sang International Parliamentary Inquiry sang APHR nga ginabug-usan sang former kag current parliamentarians sa bilog nga Southeast Asia.
Suno kay Rep. Arlene Brosas, chair sang APHR inquiry panel kag miyembro sang APHR board, tuyo sang inquiry nga mag-rekomendar sang policy reforms paagi sa pagtudlo kun ano gid nga industry activities ang makabig nga may pinakadelikado nga impact sa palibot.
Isa sa ginalantaw amo ang reclamation projects suno kay Brosas bangud amo ini ang may daku nga factor sa pagtiphag sang duta sa baybayon, risgo sa baha, kag polusyon nga palareho nga may epekto sa palibot kag sa ikaayo sang mga tawo.
Ang panel nga ginalakipan sang lima ka permanent members ang nagpatigayon na sang oral hearing sang Oktubre 26 kun sa diin may nagkalain-lain nga grupo nga nagpaguwa sang ila concerns kaangot sa reclamation projects sa pungsod.
Halimbawa, ang international environmental group nga Oceana ang nagwangal sa epekto sang Manila Bay reclamation kag ang proposed New Manila International Airport nga pareho ginhangkat sang grupo paagi sa petisyon sa Supreme Court.
“Unfortunately, this was dismissed by the Supreme Court but Oceana continued in campaigning along with some of the groups here on the projects that continue to be implemented even without the necessary consultation, participation of the people on the decision making,” suno kay Joyce Sierra, Communications Manager sang Oceana.
Present man ang government representatives sa oral hearing lakip na ang halin sa Department of Environment and Natural Resources, Environmental Management Bureau, kag Commission on Human Rights.
Magluwas sa inquiry sa Pilipinas, may kaangay man nga oral hearings sa Indonesia kag Malaysia.
Ang outcome report sini ang igapasa sa 29th Conference of Parties (COP 29) sang UN Climate Change Conference nga hiwaton sa Baku, Azerbaijan sa Nobyembre.
