Nagretiro na sa Philippine Basketball Association (PBA) ang isa sa pinakamaayo nga imports nga si Allen Durham matapos ang isa ka dekada man nga pagpakita sang abilidad sa basketball sa Pilipinas.
Kilala si Durham nga three-time Best Import awardee sa idalom sang Meralco Bolts nga patas sa awards nga nakuha sang Ginebra star nga si Justin Brownlee nga kilala man nga iya pinakadaku nga rival sa court.
Pahayag ni Durham, nagbiya na siya sa PBA bilang pagpanghanda sa dalayon gid sini nga pagretiro sa basketball sa masunod nga tuig.
Si Durham ang nanguna sa Bolts sa ila nauna nga tatlo ka PBA finals appearances apang ginakabos gid pirme batok kay Brownlee kag sa Ginebra.
Siya ang best reinforcement sa sulod sang tatlo ka tuig partikular sang 2016, 2017, kag 2020 editions sang Governor’s Cup.
Sini lang nga tuig, may deja vu nga natabo sang gintapos ni Durham ang iya PBA career sa kamot gihapon ni Brownlee kag sang Gin Kings paagi sa 3-0 sweep sa quarterfinals sang PBA Governor’s Cup conference.
Ulihi nga nakahampang si Durham para sa Bolts sa East Asia Super League (EASL) sang nagligad nga October 16 nga naka-skor sang 14 points sa 77-74 nga kalutusan batok sa iya former team nga Ryukyu sa Okinawa, Japan.
Antes magbalik si Durham sa Michigan sa United States subong nga adlaw, nagpatigayon ang franchise sang thanksgiving party para sa iya sa company headquarters sa Pasig sabg Martes.
Indi lamang sa PBA nakasentro ang karera sang 36-anyos nga basketball star.
Ginkilala man siya anay nga Japan B.League Finals Most Valuable Player sang 2023 matapos ginpangunahan ang Ryukyu Golden Kings sa championship.
Sa France, siya ang Defensive Player of the Year, isa ka All-First Team member, kag All-Import team member sang duha ka beses sa second-tier French LNB Pro B League.
Nakahampang man siya sa Romania, Finland, Israel, Uruguay, Korea, kag sa NBA G League.
