Ginpasakaan na sang criminal complaint ang administrador kag lima pa ka mga personnel sang Barangka public cemetery sa Marikina bangud sa indi otorisado nga pagpangkutkot sang bangkay sang mga tawo.
Mismo si Marikina Mayor Marcelino Teodoro ang nagmandu sang pagpasaka sang panumbungon sa Marikina prosecutor’s office batok kanday Renato Beltran, Ian Lester Beltran, Irish Santos, Rowell Ogayon, Pablo Papa kag certain Solayao bangud sa ginaalegar nga paglapas sa Presidential Decree 856 ukon ang Code on Sanitation of the Philippines.
Magluwas diri, may ginpasaka man batok sa anum nga administrative complaints for grave neglect in the performance of duty.
Ginmandu ini nga mga panumbungon matapos nakit-an ang 800 ka sako sang mga bangkay sang tawo nga iligal nga ginkutkot sa amo nga patyo sang nagpatigayon sang inspeksyon sang nagligad nga Myerkules.
Nakit-an man nga ginbilin lamang ang mga tul-an sa isa ka open space sa amo nga patyo.
Suno kay Teodoro, nadiskubrehan nga ang mga personnel sang patyo ang involved sa scheme ukon buluhaton sang sindikato kun sa diin ginabaligya ang available nga mga pantyon sa mas mataas nga presyo.
Sa nakaandan, may cash donation lang kuntani nga P1,000 to P2,000 sa kada lubong apang suno kay Teodoro, nagapangayo ang mga suspek sang P20,000 sa kada may nagapalubong sang ila minatay.
Una na nga ginrason ni Barangka Public Cemetery Administrative Officer Reynato Beltran nga ang mga bangkay nga nakalapaw na sa five-year limit ang dapat nga paguwa-on na sa patyon bangud sa 5,000-grave capacity sa amo nga patyo.#
