Indi magtambong si former President Rodrigo Duterte sa hearing sang quad committee sa Kamara 9:30 buwas sa aga nga nagatuyo kuntani nga magpadayon sa imbestigasyon sa drug war kag ginaalegar nga extrajudicial killings.
Nakasaad ini sa malawig nga sulat nga ginpadala sang abogado ni Duterte nga si Atty. Martin Delgra III kag naka-address kay Surigao del Norte 2nd District Rep. Robert Ace Barbers nga amo ang overall chairman sang quad comm.
Pahayag ni Delgra, nabaton niya ang imbitasyon para kay Duterte sang nagligad pa nga Nobyembre 2.
Sang ginkonsulta sini ang former president, nag-desisyon ini nga magpaiway sa pagtambong sa joint committee (Committees on Public Accounts, Dangerous Drugs, Public Order and Security, kag Human Rights) bangud sa masunod nga mga rason:
Una, suno sa sulat, nagaduda si Duterte sa integridad sang quad comm bangud nagapati siya nga isa ini ka “political ploy” nga nagatuyo lamang nga ma-indict siya sa krimen ukon mga krimen nga wala man niya ginhimo.
“While my client’s attendance is supposedly for him to provide valuable insights and to shed light on issues under discussion particularly on extra-judicial killings, it is apparent that the inquiry is a mere political ploy aimed to indict him for crime or crimes he did not commit,” kabahin sang sulat nga gin-release man sa media, Nobyembre 6.
Partikular man nga ginmensyonar ang posisyon nanday quad co-chairmen Rep. Bienvenido Abante Jr. kag Rep. Dan Fernandez nga dapat mangin liable si Duterte sa pagpamatay sa idalom sang Section 6 sang Republic Act No. 9851 ukon ang “Philippine Act on Crimes Against International Humanitarian Law, Genocide and Other Crimes Against Humanity.”
Suno sa abogado, kun amo ini ang pagpati sang duha ka mamalidha, dapat nga mag-file sila sang kaso-kriminal batok kay Duterte sa Department of Justice para madesisyunan kun may probable cause ukon wala.
“If that is indeed their belief, then the proper course of action would be for them to file the proper criminal cases against my client before the Department of Justice and for the latter to resolve whether probable cause exist or not. After all, we have a fully functioning judicial system in our country,” suno kay Delgra.
Ikaduha, gin-cite man sa sulat ang ginaalegar ginahimo sang quad comm nga pagpilit sa ila resource persons nga magtuad sang pila ka mga bagay apisar kulang man sila sa ihibalo.
Ginpahayag man nga ginapilit sang quad comm ang resource persons nga maghambal sang indi matuod kadungan sang inquiry nga isa ka kaso sang “subordination” suno sa former president.
Ikatatlo, ginsiling sang kampo ni Duterte nga nakatambong na siya sa Senate drug war hearing kag sa sulod sang malapit siyam ka oras, napakigbahin na sini ang iya luyag ihambal kaangot sa ginaalegar extrajudicial killings sa tion sang iya administrasyon.
“In the said hearing which lasted for almost nine hours, my client extensively discussed and shared his knowledge as to the alleged extrajudicially killings during his administration,” kabahin pa sang sulat. “More importantly, he gave valuable inputs on how to strengthen the war on illegal drugs, a demonizing element and national menace.”
Matapos ginplastar ang mga rason, ginsiling man sang kampo ni Duterte nga agud makakinot sa oras kag kuwarta sang mga nagabayad sang buwis, indi na lang siya magkadto sa quad comm hearing.
Ginsuhestyon man nga ipadala na lang sa quad comm ang transcript sang hearing sa Senado bangud nakakomiter naman ang Senate subcommittee chair nga si Sen. Koko Pimentel nga available man ang transcript pananglitan may yara sang gusto nga mag-request sang kopya sini.
“In view of the foregoing, it is my client’s position that his presence before the Honorable Joint Committee in the public hearing set on November 7, 2024, at Quezon City, is no longer necessary,” sulat ni Delgra.
Matandaan nga antes sini nga hearing sang apat ka mga committee sa Kamara, una na nga nagpamalibad si Duterte nga magtambong sa inquiry sang quad comm sang Oktubre 22 bangud ginsiling sini nga “short notice” ang nahatag sa ila kag malain pa ang iya pamatyag.
Sang amo nga tion, nagpasalig pa ang iya abogado nga handa sila mag-atubang sa quad comm pagkatapos sang Nobyembre 1.
Oktubre 28 sang nag-atubang si Duterte sa Senate hearing nga naglawig sang masobra walo ka oras.
Didto kag nakabalos ini sa mga atake sa iya kaangot sa drug war, kag nakahaboy man sang mga pamangkot kag statement ang iya suod nga kaalyado kag anay PNP chief Senator Ronald “Bato” Dela Rosa.
Nagpangindi pa si Duterte nga magguwa sa Senate hall apisar gina-excuse na siya sang mga senador bangud ginpahayag sini nga gusto niya sabton ang tanan nga pamangkot sa drug war.
Lakip sa mainit nga mga topiko sa Senate hearing amo ang pagtuad ni Duterte nga may death squad; ang iya mandu sa pulis nga hayluhon ang drug suspects nga magbato agud may rason sila nga patyon ang mga ini; sabtanay sa tunga sang former president kag ni Senator Risa Hontiveros; kag ang pag-ako ni Duterte sa “full legal responsibility” sa drug war campaign apang pagpamalibad nga akuon ang responsibilidad sa mga nagkalamatay sa police operations kaangay sang solterito ngas si Kian Delos Santos.#
