Gin-anunsyo sang Malacañang nga indi magtambong si President Ferdinand Marcos, Jr. sa Asia-Pacific Economic Cooperation (APEC) summit sa Peru subong nga bulan agud nga mahatagan sang prayoridad ang mga problema sa Pilipinas kaangay sang pag-address sa epekto sang mga kalamidad.
Gin-appoint man sini si acting Trade Secretary Ma. Cristina Roque bilang special envoy sa APEC Economic Leaders’ Week nga hiwaton sa Nobyembre 10 tubtub 16 sa Lima.
Ini ang una nga tion nga ipaiway ni Marcos ang personal nga pagkadto sa APEC summit.
Isa ini ka pagtilipon sang mga lider kag opisyal halin sa 21 member economies kada tuig. Isa ang Pilipinas sa 12 founding members sang forum halin sang 1989.
Base sa official website sang APEC, ang summit subong nga tuig ang maga-consolidate sang bag-o nga approach sa economic cooperation agenda sang forum sa tunga sang nagkalain-lain nga mga pagpanghangkat.
Ang designation naman ni Roque bilang special envoy sang presidente sa APEC ang isa sa bag-o nga appointments nga gin-anunsyo sang Presidential Communications Office, Nobyembre 7.
