Naghingyo si Cassandra Ong sa House Quad Committee nga tugutan ang iya abyan nga updan siya sa detention cell sa Correctional Institute for Women (CIW).
Suno kay Abang Lingkod party-list Representative Stephen Paduano nga co-chairman sa mega-panel, ginpalab-ot sa ila ang sulat bangud ginaalegar nga nagasuprer na si Ong sang severe mental breakdowns kag anxiety attacks kag yara na subong sa state of severe depression.
Naka-detain si Ong sa CIW matapos siya nga i-contempt sang QuadComm bangud nagpamalibad ini nga ipasa ang mga ginahingyo nga dokumento kaangot sa Philippine Offshore Gaming Operator (POGO) hub nga Lucky South 99 kag iban pa nga kaangot nga papeles.
Ginatudlo nga authorized representative si Ong sang Lucky South 99 nga may sampaw-sampaw nga mga kriminal nga buluhaton.
Ginsiling naman ni Antipolo Representative Romeo Acop nga kinahanglan anay ikonsulta sang QuadComm sa pamunuan sang CIW ang request ni Ong para mahibaluan kun pwede ini sa idalom sang ila nga patakaran.
“Pending verification with the CIW, with regards to their protocol, ‘pag okay sila, go na natin. Kaysa naman mag-hearing pa tayo for this matter, Mr. Chairman, or wait for the next hearing,” suno naman kay Paduano.
Gin-request naman sang isa pa ka chairman nga si Laguna Rep. Dan Fernandez nga magpadala sang House medical team sa CIW para ma-check ang ikaayong lawas ni Ong.
Gin-ugyunan sang quad comm lakip na si over-all chairman Surigao del Norte Rep. Ace Barbers nga sundon ang mangin desisyon sang CIW kaangot sa request ni Ong.
“In that case, I would like to ask the committee secretariat to closely coordinate with the CIW. When the CIW replies and allows that a detainee be accompanied by a friend, then the committee will already allow a friend to accompany Ms. Cassandra Ong,” pahayag ni Barbers.
Nahibaluan nga ginasuspetsahan sang quad comm nga isa lamang ka dummy para sa Lucky South 99 si Ong bangud sa pagpamalibad sini nga magpakita sang mga dokumento lakip na ang ginhalinan sang iya manggad.
